گھر میں آگ لگنے سے 21 بلیاں اور ایک کتاہلاک

ٹورانٹو برن فیلڈ ایونیو کے ایک گھر میں آگ لگنے سے 21 بلیاں اور ایک کتاہلاک،کئی جانور بچا لیے گئے۔ تفصیلات کے مطابق گزشتہ دن برن فیلڈ ایونیو ڈوپنٹ سٹریٹ کے ایک گھر میں اچانک آگ بھڑکنے سے موقع پر ہی 21 بلیاں اور ایک کتاہلاک ہوگئے جبکہ گھر سے باپ اور بیٹے کو محفوظ حالت میں نکال لیا گیا۔

گھر سے چار بلیوں اور کئی دیگر جانوروں کو بھی زندہ نکال لیا گیا جن میں سے چند زخمی ہیں۔

سٹریٹ میں رہنے والے دیگر افراد نے اس واقعے پر افسوس کا اظہار کرتے ہوئے کہا ہے کہ اس وقت ہمارا دل خون کے آنسو رو رہا تھا جب مردہ حالت میں جانوروں کو گھر سے نکالا جارہا تھا۔

پولیس کے مطابق زیادہ تر جانور دھویں کی زیادتی کی وجہ سے ہلاک ہوگئے ہیں۔